Saramaganta en Bande.

Se de xoias falabamos no anterior post, de xoias imos seguir falando neste, para mín, e isto é unha reflexión moi persoal, se existe unha xoia da fauna galega esa é a saramaganta (Chioglossa lusitanica), un anfibio urodelo endémico do cadrante noocidental ibérico.

A saramanganta é un anfibio escaso na provincia de Ourense, os seus requerimentos non casan moi ben cas características climáticas da provincia, aínda así a especie aparece en contados puntos da mesma, un deles a Baixa Limia.

A saramaganta é coñecida tamén co nome de píntega rabilonga, pola máis que considerable lonxitude da cauda, que é superior á lonxitude da cabeza e do corpo xuntos, así mesmo, en Padrenda é coñecida co nome de píntiga das follas, seica por que é habitual bela entre as follas do chan das árbores da ribeira dos regatos.

O exemplar que podedes apreciar nas imaxes foi atopado o pasado día 3 de outubro de 2010 en terreos do cooncello de Bande, na compaña de Rafa Vázquez Graña e Vituca.