Cobra d´auga de colar en Vilar de Santos.

Como xa vos comentei onte, pronto moi pronto, teremos a oportunidade de profuncizar no coñecimento da herpetofauna ourensá, a través das xornadas formativas do proxecto SARE.

Mentras non comezan agasállovos con este xuvenil de cobra d´auga de colar (Natrix natrix) atopado tristemente atropelado nunha das numerosas pistas que a concentración parcelaria trouxo consigo na bisbarra da Limia. A apertura e posterior asfaltado destas pistas facilitou o acceso do tráfico rodado a zonas de alta sensibilidade ambiental, supondo unha masacre para as diferentes especies de hérpetos. Xa que perecen atropeladas frecuentemente.

O nome de cobra d´auga de colar venlle dado polo curioso colar de cor craro que posúen no pescozo os exemplares xuveniles, xa que as poboacións ibéricas desta especie perden este característico colar ao chegaren á idade adulta. Ainda que ocasionalmente poden aparecer exemplares adultos con trazas do colar, mantendo caracteres xuveniles chegada a madurez.

O exemplar que aquí vos presento foi atopado o pasado día 21 de abril de 2011 en terreos do concello limiao de Vilar de Santos.